ಜಿಮ್ ಕಾರ್ಬೆಟ್ --- ಕಾಡಿನ ನಿಜವಾದ ಅನುಭವ.. ಭಾಗ ೨

 ಜೂನ್ ೨೧ ೨೦೨೩ ಬುಧವಾರ ಬೆಳಿಗ್ಗೆ...

(ಮೊದಲ ಭಾಗ ಓದಲು - https://guruprsad.blogspot.com/2023/07/1.html)      

ರಾತ್ರಿ ಲೇಟ್ ಆಗಿ ಮಲಗಿದ್ದರು  ಸಹ ... ಸಮಯಕ್ಕೆ ಮುಂಚೆನೇ ಎಚ್ಚರ ಆಗಿತ್ತು ... ಅದಕ್ಕೆ ಕಾರಣ ಹೊಸ ಹೊಸ ಪಕ್ಷಿಗಳನ್ನು  ನೋಡ ಸಿಗುವ ಆನಂದ...  ಕೆಲವೊಂದು ಪಕ್ಷಿ ಪ್ರಭೇದ ಹಿಮಾಲಯದ ತಪ್ಪಲಿಗೆ ಮಾತ್ರ ಸೀಮಿತ.. ಇವುಗಳನ್ನು ಬೇರೆ ಕಡೆ ನೋಡುವ ಸೌಭಾಗ್ಯ ಸಿಗುವುದು ಕಮ್ಮಿಯೇ...  ಅದಕ್ಕೆ ನಮ್ಮ ಕುತೂಹಲ ಹೆಚ್ಚಾಗಿತ್ತು...

ಬೆಳಿಗ್ಗೆ ೫.೩೦ ಬೇಗ ಬೆಳಕು ಹರಿದಿತ್ತು... ಬೆಳಿಗ್ಗೆ ಎದ್ದ ಕೂಡಲೇ ಹೊರಗಡೆ ಬಂದು ನೋಡಿದೆ.... ಸುತ್ತಲು ಬೆಟ್ಟ ಗುಡ್ಡಗಳಿಂದ ಆವರಿಸಿದ ಕಾಡು..  ನಮ್ಮ ಫಾರೆಸ್ಟ್ ಗೆಸ್ಟ್ ಹೌಸ್ ಮುಂದೆ ವಿಶಾಲ ಜಾಗ... ಬಾನೆತ್ತರ ಬೆಳೆದು ನಿಂತ ಮರಗಳು. ಆಗಲೇ ಹಕ್ಕಿಗಳ ಚಿಲಿ ಪಿಲಿ  ನಿನಾದ ಜೋರಾಗಿ ಕೇಳುತ್ತ ಇತ್ತು..

ಬೇಗ ಬೇಗ ರೆಡಿ ಆಗಿ ಕ್ಯಾಮೆರಾ ಸಮೇತ ಹೊರಗಡೆ ಬಂದೆ.  ಅಷ್ಟರಲ್ಲಿ ಆಗಲೇ ನಮ್ಮ ಅಮರ್ ಚಂದ್ ಚಪಾತಿ ಹಾಗು ಪಲ್ಯ ರೆಡಿ ಮಾಡ್ತೇನೆ ತಿನ್ಕೊಂಡು ಹೊರಡೋಣ ಅಥವಾ ಕಟ್ಟಿಕೊಂಡು ಹೊರಡೋಣ ಅಂತ ಹೇಳಿ ರೆಡಿ ಮಾಡಲಿಕ್ಕೆ ಹೋದರು.  ಅಮರ್ ಚಂದ್ ಅಪ್ಪಟ ಉತ್ತರಾಖಂಡ್ ರಾಜ್ಯದ ದೇಸಿ ಹುಡುಗ. ಒಳ್ಳೆಯ ಕುಕ್  ನಾವು ಇದ್ದಷ್ಟು ದಿನ ನಮಗೆ ಬೇಕಾದ ಹಾಗೆ ರುಚಿ ರುಚಿ ಅಡುಗೆ ಮಾಡಿ ಕೊಡುತ್ತ ಇದ್ದರು. ಹಾಗೆ ಇವರ ಪಕ್ಷಿ ಬಗ್ಗೆ ಇರುವ ಜ್ಞಾನ ಕೂಡ ಅಪಾರ ..ಇದು ನಮಗೆ ಪಕ್ಷಿ ವೀಕ್ಷಣೆ ಹಾಗು ಸರ್ವೇ ಸಮಯದಲ್ಲಿ ನೆರವಾಯಿತು.

ಒಂದು ಕೈ ನಲ್ಲಿ ಟೀ ಹಿಡ್ಕೊಂಡು ಬೈನಾಕ್ಯುಲರ್ ಹೆಗಲಿಗೆ ಹಾಕಿಕೊಂಡು ಬೆಳಿಗ್ಗೆ ಬೆಳಿಗ್ಗೆನೇ ನಮ್ಮ ಗೆಸ್ಟ್ ಹೌಸ್ ಆವರಣದಲ್ಲಿ ಇದ್ದ ಪಕ್ಷಿಗಳ ಚಲನ ವಲನ ಗಮನಿಸಿ ರೆಕಾರ್ಡ್ ಮಾಡುವುದಕ್ಕೆ ಶುರು ಮಾಡಿದೆವು...

ಡಾಲರ್ ಬರ್ಡ್, ಕಲೀಜ್ ಫೆಸೆಂಟ್ , Grey-headed Woodpecker, red jungle Blue Whistling-Thrush, Greater Hornbill , paradise fly-catcher .. ಹೀಗೆ ಅನೇಕ ಹೊಸ ಹೊಸ ಮತ್ತು ನೋಡಿರುವ ಪಕ್ಷಿ ಹತ್ತಿರದಲ್ಲೇ ಹರಡುತ್ತಾ ತನ್ನ ಬೆಳಗಿನ ದಿನಚರಿ ಪ್ರಾಂಭಿಸಿತ್ತು..

Blue Whistling-Thrush

Rosy Starlings

Grey-headed Woodpecker

White-crested Laughingthrush

Red junglefowl

ಬರೀ ಸೌತ್ ಇಂಡಿಯಾ ಕಡೆ ಬರ್ಡಿಂಗ್ ಮಾಡಿದ್ದ ನನಗೆ .. ಇಲ್ಲಿನ ಪರಿಸರದ ಅಂದರೆ ಹಿಮಾಲಯ ಬೆಲ್ಟ್ ನಲ್ಲಿ ಮಾತ್ರ ಕಾಣಸಿಗುವ ಒಂದೊಂದು ಪಕ್ಷಿಗಳು ನಮಗೆ  ಹೊಸ ಹೊಸ ಪಕ್ಷಿ,  ಮೊದಲ ಸರಿ ನೋಡುವ ಅನುಭವ ... ಅಬ್ಬಾ ಕುತೂಹಲ. ಸಂತೋಷ, ಒಟ್ಟಿಗೆ  ಆಗ್ತಾ ಇತ್ತು.. ನಾನು ಮತ್ತು ನಮ್ಮ ಸಹಪಾಠಿ ಮುನೀಶ್ ಒಂದೊಂದು ಹಕ್ಕಿ ನೋಡಿ ಅದನ್ನು ರೆಕಾರ್ಡ್ ಮಾಡುತ್ತ ಖುಷಿ ಪಡ್ತಾ ಇದ್ವಿ.  

ಇನ್ನು ನಾವು ಬರ್ಡಿಂಗ್ ಟ್ರೇಲ್ ಅಂತ ಕಾಡಿಗೆ ಹೋಗಿಲ್ಲ ಇಲ್ಲೇ ಇಷ್ಟು ಬರ್ಡ್ಸ್ ನೋಡಲಿಕ್ಕೆ ಸಿಗುತ್ತಾ ಇದೆ ಇನ್ನು ಕಾಡಿನ ಒಳಗಡೆ?...  ಇನ್ನು ಏನೇನು ಸಿಗಬಹುದು ಎಂದು ಖುಷಿ ಇಂದ ಇದ್ವಿ.

ಅಷ್ಟರಲ್ಲಿ  ನಮ್ಮ ಅಮರ್ ಕೂಗಿ ಕರೆದ ಪರೋಟ , ಚಪಾತಿ ರೆಡಿ ಇದೆ ಅಂತ.  ಬೆಳಿಗ್ಗೆ ಇನ್ನು ೬-೩೦ ಇಷ್ಟು ಬೇಗ ತಿನ್ನೋದ ಅಥವಾ ಪ್ಯಾಕ್ ಮಾಡಿಕೊಂಡು ಹೋಗೋದ ಅಂತ ಯೋಚಿಸ್ತಾ ಇದ್ವಿ.. ಪ್ಯಾಕ್ ಆಗೋಲ್ಲ ಯಾಕೆ ಅಂದ್ರೆ ನಮ್ಮ bagpack ಜಾಸ್ತಿ ನೇ ಇದೆ , ಕ್ಯಾಮೆರಾ, ಬೈನಾಕ್ಯುಲರ್, water bottle, ಫೀಲ್ಡ್ ಗೈಡ್ .. ಇದರ ಜೊತೆ ತಿಂಡಿ ಕೂಡ ಅಂದರೆ ನೆಡೆಯಲು ತೊಂದರೆ ಆಗುತ್ತೆ ಅಂತ . ಒಂದೆರಡು ಚಪಾತಿ /ಪರೋಟ ಅಲ್ಲೇ ತಿಂದು ಹೊರಟೆವು .

ಬೆಳಗಿನ ಎಳೆ ಬಿಸಿಲು , ಮುಂಜಾನೆಯ ದಟ್ಟ ಮಂಜನ್ನು ಸೀಳಿ ನಿದಾನಕ್ಕೆ ಹೊರಚಾಚುತ್ತ ಇದ್ದ ರೀತಿ ಕಣ್ಣಿಗೆ ಮುದವನ್ನು ನೀಡಿತ್ತು. 

ತಂಪಾದ ಆಹ್ಲಾದಕರ ವಾತಾವರಣ.  ಮಳೆಗಾಲದ  ಮುಂಗಾರಿನ ದಿನಗಳು. ಮೋಡ ಅವರಿಸಿದ್ದರು ಸೆಕೆ ಮತ್ತು ಉಷ್ಣಾಂಶ ತುಸು ಹೆಚ್ಚೇ ಇತ್ತು.  

ಕಿರಿದಾದ ಕಣಿವೆ, ಸಣ್ಣಗೆ ಹರಿಯುವ ಝರಿ ...ಅದರಲ್ಲೇ ನೆಡೆದು ಕೊಂಡು ಧಾಟಿ ಸಾಗುತ್ತ ಇದ್ದ ನಮ್ಮ ಪಯಣ...  ಇದರ ಮಧ್ಯ ...ಜಿಂಕೆ ,,,ಸಾರಂಗ ಮುಂತಾದ ಕಾಡು ಪ್ರಾಣಿಗಳ ಚಲನ ವಲನ ಹತ್ತಿರದಿಂದ ಕಾಣುತ್ತ ಇತ್ತು...

ನಮ್ಮ ಜೊತೆ ಫಾರೆಸ್ಟ್ ಗಾರ್ಡ್ ಮತ್ತು RFO ಕೂಡ ಜೊತೆಗೆ ಇದ್ದರು..   ನೆಡೆದು ಕೊಂಡು ಹೋಗುತ್ತಾ ಅವರ ಜೊತೆ ಇಲ್ಲಿನ ಕಾಡು ಮತ್ತು ಪರಿಸರದ ಅವರ ಅನುಭವ . ಹೊಸ ಹೊಸ  ತರಹದ ಚಿಟ್ಟೆಗಳು, ಕಾಡಿನ ಮರ, ಗಿಡಳ ಪರಿಚಯ   ಎಲ್ಲವನ್ನು ರೆಕಾರ್ಡ್ ಮಾಡಿಕೊಳ್ಳುತ್ತಾ ಜಿಮ್ ಕಾರ್ಬೆಟ್ ಎನ್ನುವವ ಸುಂದರ ಕಾಡಿನ  ನೈಜ ಸೊಬಗನ್ನು ನೋಡುತ್ತಾ ಸಾಗುತ್ತಲಿತ್ತು ನಮ್ಮ ಪಯಣ..

ಅಷ್ಟರಲ್ಲಿ ನಮ್ಮ ಜೊತೆಗಾರ ಮುನೀಶ್ ಅವರು ಕೆಲವು ಅಪರೂಪದ ಪಕ್ಷಿಗಳ ಚಲನ ವಲನ ಗಮನಿಸಿ ಅಲ್ಲೇ ಸ್ವಲ್ಪ ಒಳಗೆ ಕಡಿದಾದ ಕಣಿವೆ ಇಳಿದು ಅದನ್ನು ಹುಡುಕಿ ಹೊರಟೆವು...

ಅಬ್ಬಾ ... ಹಸಿರು, ಹಳದಿ ಕಪ್ಪು ಬಣ್ಣದ ಲಾಂಗ್ ಟೈಲ್ಡ್ ಬ್ರಾಡ್ ಬಿಲ್(Long-tailed broadbill)

ಹಕ್ಕಿ ಮೊದಲ ಬಾರಿ ಕಂಡಾಗ ಅಲ್ಲೇ ಕೂಗಬೇಕು ಅನ್ನಿಸಿತು... ಅಷ್ಟು ಹತ್ತಿರ ದಿಂದ ಅವುಗಳ ಚಲನ ಆಟೋಟ. ನೋಡುತ್ತಾ ಮೈಮರೆತು ನಿಂತಿದ್ವಿ..

 ಅದಾಗಲೇ ಪಕ್ಷಿಗಳ ಲೋಕದಲ್ಲಿ ಮಿಂದು ತೇಲುತ್ತ ಹೊಸ ಹೊಸ ಪಕ್ಷಿಗಳ ಪರಿಚಯ ಮಾಡಿಕೊಳ್ಳುತ್ತ  ಒಂದು ಎಂಟರಿಂದ ಹತ್ತು km  ನೆಡೆದು ದಟ್ಟ ಕಾಡಿನ ನಡುವೆ ತುಂಬಾ ಒಳಗೆ ಬಂದಿದ್ವಿ...

ನಮ್ಮ ಜೊತೆ ತಂದಿದ್ದ ಬಿಸ್ಕಿತ್ತ್ ಮತ್ತು ನೀರು ಕುಡಿದು ಒಂದು ಕಡೆ ದಣಿವಾರಿಸಿಕೊಳ್ಳೋಣ ಎಂದು ಕುಳಿತೆವು.. 

ಅಷ್ಟರಲ್ಲಿ ನಮ್ಮ ಜೊತೆ ಬಂದಿದ್ದ ಫಾರೆಸ್ಟ್ ಗಾರ್ಡ್ "ಸಾರ್ ಅಲ್ಲೇ ನನಗೆ ಎರಡು ವರ್ಷದ ಕೆಳಗೆ ಹುಲಿ ದಾಳಿ ಮಾಡಿದ್ದೂ ಅಂತ ಜಾಗ ತೋರಿಸಿದ"  ನಾನು ನೀರು ಕುಡಿತಾ  ಇದ್ದವನು  ಚೆಕ್ ಅಂತ  ಎದ್ದು ಇವ ಏನು ಹೇಳುತ್ತಾ ಇದ್ದಾನೆ...ಏನಾದ್ರು ತಮಾಷೆ ಮಾಡ್ತಾ ಇದ್ದಾನ ಎಂದು ಅವನ ಪಕ್ಕ ಹೋಗಿ ಕುಳಿತು ನಿದಾನವಾಗಿ ಕೇಳಿದೆ...   ಅ ಪುಣ್ಯಾತ್ಮನ ಹುಲಿ ಜೊತೆಗಿನ ದಾಳಿ ಮತ್ತು ಸೆಣೆಸಾಟದ ಕತೆ ಕೇಳುತ್ತಾ  ಮೈ ಸಣ್ಣಗೆ ನಡುಗಲು ಶುರುವಾಯಿತು..

"ಅಲ್ಲಿ ಕೈ ತೋರಿಸಿ ... ಸಾರ್ ಅಲ್ಲಿ ನೋಡಿ ಅದೇ ಜಾಗ... ಅಲ್ಲಿ ಗುಡ್ಡದ ಮೇಲೆ ಕಾಣುತ್ತ ಇದೆ ಅಲ್ವ ಅದೇ ಜಾಗ ಸಾಬ್ ... ನಾವೆಲ್ಲಾ ಒಟ್ಟಿಗೆ ಬೀಟ್ ಗೆ ಬಂದಿದ್ದೆವು.. ನಮ್ಮ ಪಾಡಿಗೆ ನಾವು ಮಾತನಾಡುತ್ತ ಸಾಗುತ್ತ ಇದ್ದಾಗ ಅದೆಲ್ಲಿ ಇತ್ತೋ ಹುಲಿ ಎದುರು ಗಡೆ ಇಂದ ನೇರವಾಗಿ ನಮ್ಮ ಮೇಲೆ ಎಗರಿತು ಸಾರ್.. ಬರಿ ಒಂದು  ಹತ್ತು ಸೆಕೆಂಡ್..  ಅಷ್ಟೇ ನಾನು ನನ್ನ ಕೈನಲ್ಲಿ ಇದ್ದ ಕೋಲು ಅಡ್ಡ ವಾಗಿ ಹಿಡ್ಕೊಂಡು ಮುಂದೆ ತಳ್ಳಿದೆ... ನಮ್ಮ ಜೊತೆ ಬಂದೂಕು, ಕೋವಿ  ಎಲ್ಲಾ  ಇದ್ದರು ಏನು ಮಾಡಲು ಆಗಲಿಲ್ಲ.. ಅದು ಯಾವ ಮಾಯದಲ್ಲಿ ಬಂತೋ ಸಾರ್... ಬಂದಿದ್ದೆ ನನ್ನನ್ನು ಟಾರ್ಗೆಟ್ ಮಾಡಿತು..ಅಂತ ಆವಾಗಿನ ಹುಲಿ ಅಟ್ಯಾಕ್ ಅದ  ಫೋಟೋ  ತೋರಿಸುತ್ತಾ  ತನ್ನ ಮಾತು ಮುಂದುವರಿಸಿದ..   ಹಾಗೆ ಹೇಳುವಾಗ ಅವತ್ತಿನ ಆ ಭಯಾನಕ ದೃಶ್ಯ ಅವನ ಕಣ್ಣ ಮುಂದೆ ಬಂದಿರಬೇಕು.. ಇನ್ನು ಹೆದರಿಕೊಂಡೇ ಹೇಳುತ್ತಾ ಇದ್ದ ರೀತಿ ಅವನ ಮುಖ ದಲ್ಲಿ ಕಾಣಿಸುತ್ತ ಇತ್ತು..   " ಆಮೇಲೆ ನಮ್ಮ ಜೊತೆ ಇದ್ದ ಐದು ಜನ ಕೋಲು ಕಟ್ಟಿಗೆ ಇಂದ ಜೋರಾಗಿ ಗಲಾಟೆ ಮಾಡಿ ಅದರ ಮೇಲೆ ಎರಗಿದೆವು ಸಾರ್.  ಅಷ್ಟರಲ್ಲಿ ನನ್ನ ತಲೆ ಮತ್ತು ಭುಜಕ್ಕೆ ಅ ಹುಲಿ ತನ್ನ ಪಂಜಾ ಇಂದ ಹೊಡೆದು ಗಯಾ ಮಾಡಿತ್ತು... ಅಷ್ಟೇ ಸಾರ್ ನನಗೆ ಗೊತ್ತಾಗಿದ್ದು.. ಆಮೇಲೆ ಬರಿ ಅರ್ಧ ಜೀವ ಆಗಿತ್ತು ಅಂತ ಭಯದಿಂದಲೇ ಹೇಳಿದ್ದ.. ಇಲ್ಲಿ ಹುಲಿಗಳು ತುಂಬಾ ಭಯಂಕರ .. ಖತರ್ನಾಕ್  ಸರ್..ಯಾವಾಗ ಹೇಗೆ ಬಂದು ಮೇಲೆ ಎಗರುತ್ತವೋ ಗೊತ್ತಾಗೋದೇ ಇಲ್ಲ..  

ಅಷ್ಟರಲ್ಲಿ ಪಕ್ಕದಲ್ಲೇ ಇದ್ದ ಇನ್ನೊಬ್ಬ ಫಾರೆಸ್ಟ್  ಗಾರ್ಡ್ " ನಾನೇ ರೋಡ್ ತನಕ ಹೆಗಲ ಮೇಲೆ ಹಾಕಿಕೊಂಡು ಏಳು ಎಂಟು km  ತನಕ ಕರ್ಕೊಂಡ್  ಹೋಗಿ ಹಾಸ್ಪಿಟಲ್ ಗೆ ಸೇರಿಸಿದೆವು ಸಾರ್.. ಹಾಸ್ಪೆಟಲ್ ಕೂಡ ಇಲ್ಲಿಂದ ಮೂವತ್ತು KM ದೂರದ ಒಂದು ಊರಿನಲ್ಲಿ ಇದೆ ಅಂತ ಅವನ ಸ್ಟೋರಿ ಹೇಳ್ತಾ ಇದ್ದ.. ಹೆಂಗೋ ಬಚಾವ  ಅದ  ಇವನು ಅಂತ ಅವನನ್ನು ಛೇಡಿಸಿ .. ನನ್ನಿಂದಲೇ ಇವ ಬಚಾವ್ ಆಗಿದ್ದು ಅಂತ ಅವನನ್ನು ರೇಗಿಸುತ್ತಾ ಇದ್ದ...

ಇದರ ಜೊತೆ ಹುಲಿ ಅಟ್ಯಾಕ್ ಮಡಿದ ಮೋಹನ್ ದಾಸ್  (ಹೆಸರು ಬದಲಿಸಲಾಗಿದೆ) ಅವರ ರಕ್ತ ಸಿಕ್ತ  ಫೋಟೋ .  ಹಾಸ್ಪಿಟಲ್ ನಲ್ಲಿ ಟ್ರೀಟ್ಮೆಂಟ್ ಮಾಡುತ್ತ ಇದ್ದ ಫೋಟೋ ನೋಡಿ  ನನ್ನ ಬೆನ್ನಿನಲ್ಲಿ ಸಣ್ಣ ನೆಡುಕ ಶುರವಾಗಿತ್ತು...

ಅಲ್ಲ... ನಾನು ನಿದಾನಕ್ಕೆ ಅವರನನ್ನ ಕೇಳಿದೆ... ಅಲ್ಲಕಂಡ್ರಪ್ಪ ..  ಈ ವಿಷಯನ.. ಮತ್ತೆ ಸ್ಟೋರಿನ ಮೊದಲೇ ಯಾಕೆ ಹೇಳಲಿಲ್ಲ ?  ಇಷ್ಟು ದೂರ ಅಂದರೆ ಒಂದು ಎಂಟು km ಕಾಡಿನಲ್ಲಿ  ಕರ್ಕೊಂಡ್ ಬಂದು  ...ನಾವು ನೆಡೆದಾಡುತ್ತ  ಖುಷಿ ಪಟ್ಕೊಂಡ್ ಹಕ್ಕಿ ಪಕ್ಷಿ ಅಂತ  ಇಲ್ಲಿ ತನಕ ಏನು ಭಯ ಇಲ್ಲದಿರ ಬಂದಿದ್ದೇವೆ.. ಇವಾಗ ಹೇಳ್ತಾ ಇದ್ದಿರಲ್ಲ...ಅಂತ ಸರಿಯಾಗಿ ಬೈಕೊಂಡ್... ಅಣ್ಣ ಇನ್ನು ಮುಂದೆ ಏನು ನೋಡೋದು ಬೇಡ... ದಯವಿಟ್ಟು ವಾಪಾಸ್ ಬೇಗ  ಬೇಗ ನಮ್ಮ ಫಾರೆಸ್ಟ್  ಗೆಸ್ಟ್ ಹೌಸ್ ಕಡೆ ಹೋಗೋಣ ಎಂದು ನಾನು ಮತ್ತು ಮುನೀಶ್ ಎದ್ದು ನಿಂತೆವು...  ಅವರು ನಮ್ಮ ನೋಡಿ ನಗ್ತಾ ಇದ್ರು..

ದೇವರಾಣೆ...ಇಷ್ಟೆಲ್ಲ ಸೀನ್ ಇದೆ ಅಂತ ಮೊದಲೇ ಗೊತ್ತಿದ್ದರೆ ನಿಜವಾಗ್ಲೂ ಇಲ್ಲಿ ತನಕ ನೆಡ್ಕೊಂಡ್  ಬರೋ ಸಾಹಸ ಮಾಡ್ತಾ ಇರಲಿಲ್ಲ ಅಂತ ಕಾಣುತ್ತೆ... ಅಯ್ಯೋ ಪಾಪಿಗಾಳ  ಎಂದು ಕೊಂಡು ಬೇಗ ಬೇಗ ನಮ್ಮ ಗೆಸ್ಟ್ ಹೌಸ್ ಕಡೆ ಹೆಜ್ಜೆ ಹಾಗಿದೆವು...

ವಾಪಾಸ್ ಬರೋವಾಗ ಯಾವ ಬರ್ಡಿಂಗ್ ಕೂಡ ಇಲ್ಲ.. ಒಂದು ಜಿಂಕೆ ಅಥವಾ ಬಾರ್ಕಿಂಗ್ ಡೀರ್ ಕೂಗುವಿಕೆ ಕೇಳಿದರೆ ಸಾಕು..  ಹುಲಿ ನೇ ಕಣ್ಣಿಗೆ ಕಾಣಿಸುತ್ತ ಇತ್ತು...

ಅಂತೂ ಶಾರ್ಟ್ ಕಟ್ ರೂಟ್ ನಿಂದ ಫಾರೆಸ್ಟ್ ನ ಇನ್ನೊಂದ್ ಕಡೆ ಇಂದ ಬೇಗ ಬೇಗ ನೆಡೆದು ರೋಡ್ ನೋಡಿದಾಗ ಮನಸ್ಸಿಗೆ  ಸಮಾಧಾನ ಆಯಿತು .....

ಅಷ್ಟೇ ವಾಪಾಸ್ ಬಂದು  ಊಟ ಮಾಡುವ ವರೆಗೂ ಅದೇ ಗುಂಗಿನಲ್ಲಿ ಇದ್ದೆವು.. ಆಮೇಲೆ ಮದ್ಯಾನ ಮತ್ತೆ ನಮ್ಮ ಹೊಸ ಹುಡುಕಾಟ ಶುರು.. ಆದರೆ ಇವಾಗ ಮೇನ್ ರೋಡ್ ಸಮೀಪ ಕಾಲು ದಾರಿ ನಲ್ಲೇ  ನೆಡೆದು ಕೊಂಡು ಹೋಗುವ ಹಾಗೆ ನಮ್ಮ ಪ್ಲಾನ್ ಚೇಂಜ್ ಮಾಡಿಕೊಂಡೆವು.. :-) 

.... 

ಮುಂದುವರಿಯುವುದು...   

ಬೆಳಿಗ್ಗೆ ಸರ್ವೇ ನಲ್ಲಿ ಸಿಕ್ಕ ಅಪರೂಪದ ಹಿಮಾಲಯ ತಪ್ಪಲಿನ ಪಕ್ಷಿಗಳು...

Black-naped monarch  with Nesting 

Crested kingfisher

Crimson sunbird

Himalayan bulbul

Yellow-footed green pigeon

Scarlet minivet

Black bulbul

Asian barred owlet

Common green magpie

 

 

ಜಿಮ್ ಕಾರ್ಬೆಟ್ ಎನ್ನುವ ಕಾಡಿನೊಳಗಿನ ರೋಮಾಂಚಕ ಪಯಣ - ಭಾಗ 1

 

ಜಿಮ್ ಕಾರ್ಬೆಟ್.... ಹುಲಿಗಳ ಕಾಡು.... ದಟ್ಟಾರಣ್ಯ.... ಅತಿ ಹೆಚ್ಚು ಸಂಖ್ಯೆಯಲ್ಲಿ ಹುಲಿಗಳು ಇರುವ ಕಾಡು..

ಹಿಮಾಲಯದ ತಪ್ಪಲಿನ ವಿಶಾಲ ಜಾಗದಲ್ಲಿ ನೈನಿತಾಲ್ ಮತ್ತು ಭಿಮತಾಲ್ ಮುಂತಾದ ಬೆಟ್ಟ ಗಳಿಂದ ಆವೃತವಾದ

ದಂಡಕಾರಣ್ಯ ..... ನಮ್ಮ ಭಾರತದ ಮೊದಲ ಹಾಗು ತುಂಬ ಹಳೆಯ ನ್ಯಾಷನಲ್ ಪಾರ್ಕ್. ಜಿಮ್ ಕಾರ್ಬೆಟ್ ಕಾಡು ಸುಮಾರು ೧೩೧೮.೫೪ sq KM ಅಷ್ಟು ವಿಸ್ತಾರವಾಗಿದೆ...

ಇಂತಹ ಕಾಡಿಗೆ ಸಫಾರಿ ಮಾಡಲು ಅಲ್ಲಿಗೆ ಹೋಗಿ ಬರಲು ತುಂಬ ಸರಿ ಪ್ರಯತ್ನ ಪಟ್ಟಿದ್ದೆ. ಕಾರಣಾಂತರ ಗಳಿಂದ ಹೋಗಲು ಆಗಿರಲಿಲ್ಲ. ಕಳೆದ ತಿಂಗಳು ಜೂನ್ ನಲ್ಲಿ ಸಡನ್ ಆಗಿ ಹೋಗಿ ಬರಲು ಅವಕಾಶ ಸಿಕ್ಕಿತ್ತು !!!! ಅದು ಎಂತ ಅವಕಾಶ ಎನ್ನುತ್ತೀರಿ !!! ..... ಕಾಡಿನಲ್ಲಿ ಇಲ್ಲಿನ ಫಾರೆಸ್ಟ್ ಡಿಪಾರ್ಟ್ಮೆಂಟ್ ಆಯೋಜಿಸಿದ್ದ ಬರ್ಡ್ ಸರ್ವೇ ಮಾಡಲು.....

ಮೊದಲೇ ಹೋಗಬೇಕು ಎಂದು ಕಾಯುತ್ತ ಇದ್ದ ನನಗೆ ಇಂಥ ಒಳ್ಳೆ ಚಾನ್ಸ್ ...ಬಾಯಿಗೆ ಜಾಮೂನು ಬಿದ್ದ ಹಾಗೆ ಹಾಗಿತ್ತು.

ಕರ್ನಾಟಕದ ನಾಗರಹೊಳೆ, ತಮಿಳುನಾಡಿನ ಹೊಸೂರು ಹಾಗು ಸೇಲಂ ಕಾಡಿನಲ್ಲಿ ಮತ್ತು ಕೇರಳ ಕಾಡಿನಲ್ಲಿ ಬರ್ಡ್ ಸರ್ವೇ ಮಾಡಿ ಅನುಭವ ವಿದ್ದ ನನಗೆ ...ಈ ಜಿಮ್ ಕಾರ್ಬೆಟ್ ನ್ಯಾಷನಲ್ ಪಾರ್ಕ್ ಇನ್ನೊಂದು ರೀತಿ ಕುತೂಹಲ ಉಂಟು ಮಾಡಿತ್ತು...

ಕಡಿಮೆ ಸಮಯದಲ್ಲಿ ಹೋಗಬೇಕಾಗಿ ಇದ್ದದ್ದರಿಂದ . ಹೇಗೋ ಮ್ಯಾನೇಜ್ ಮಾಡಿ ಆಫೀಸ್ ನಿಂದ ಒಂದು ನಾಲ್ಕು ದಿನ ರಜೆ ಗಿಟ್ಟಿಸಿ....ಹೊರಡುವ ತಯಾರಿ ಮಾಡಿಕೊಂಡೆ ...

ಜೂನ್ ಇಪ್ಪತ್ತನೇ ತಾರೀಕು ನಾವು ಜಿಮ್ ಕಾರ್ಬೆಟ್ ಹೆಡ್ ಆಫೀಸ್ ರಾಮನಗರ್ ನಲ್ಲಿ ೧೦:೩೦ ಕ್ಕೆ ರಿಪೋರ್ಟ್ ಮಾಡಿಕೊಳ್ಳ ಬೇಕಿತ್ತು..

ಕಾಡಿನ ಮತ್ತು ಅಲ್ಲಿ ಇರಬೇಕಾಗುವ ಜಾಗ ಪರಿಸರ ಬಗ್ಗೆ ಸ್ವಲ್ಪ ಗೊತ್ತಿದ್ದರಿಂದ ಬೇಕಾಗಿರುವ ಬಟ್ಟೆ , ಬರೆ ಸ್ಲೀಪಿಂಗ್ ಬ್ಯಾಗ್, ಕ್ಯಾಮರಾ, ಬೈನಾಕ್ಯುಲರ್...ಎಲ್ಲ ರೆಡಿ ಮಾಡಿಕೊಂಡು ಜೂನ್ ೧೯ ನೇ ತಾರೀಖು ಸಂಜೆ ಬೆಂಗಳೂರು ಡೆಲ್ಲಿ ಫ್ಲೈಟ್ ಹತ್ತಿದೆವು.. ನನ್ನ ಜೊತೆ ಬೆಂಗಳೂರಿನಿಂದ ಮಧುಸುಧನ್, ಸುಧಾಕರ್ ಇಬ್ಬರು ಜೊತೆಯಾದರು..

ಡೆಲ್ಲಿ ಗೆ ಮಧ್ಯರಾತ್ರಿ ಹೊತ್ತಿಗೆ ತಲುಪಿ ಅಲ್ಲಿಂದ ಮೊದಲೇ ಬುಕ್ ಮಾಡಿದ್ದ ಕಾರ್ ನಲ್ಲಿ ಉತ್ತರಾಖಂಡ್ ನ ರಾಮನಗರ್ ಕಡೆ ಹೊರಟೆವು ...

ರಾಮನಗರ್ ತಲುಪುವ ಹೊತ್ತಿಗೆ ಬೆಳಿಗ್ಗೆ ಆರು ಘಂಟೆ ಆಗಿತ್ತು.. ಹೆಡ್ ಆಫೀಸ್ ಪಕ್ಕದಲ್ಲೇ ಒಂದು ಸಣ್ಣ ರೂಮ್ ಬುಕ್ ಮಾಡಿ ಫ್ರೆಶ್ ಆಗಿ . ಡೈರೆಕ್ಟರ್ ಆಫೀಸ್ ಗೆ ಹೋಗಿ ರಿಪೋರ್ಟ್ ಮಾಡಿಕೊಂಡೆವು... ಇಲ್ಲಿಗೆ ಬೆಂಗಳೂರಿನಿಂದ ಬಂದಿದ್ದ ಮುನೇಶ್ ಗೌಡ ಅವರು ಜೊತೆಯಾದರು. ಒಟ್ಟು ನಾವು ನಾಲ್ಕು ಜನ ಬೆಂಗಳೂರಿಗರು .... ನಮ್ಮ ಜೊತೆ ಬೇರೆ ಒಂದಿಬ್ಬರು ಕರ್ನಾಟಕ ಮತ್ತು ಬೆಂಗಳೂರಿನಿಂದ ಬಂದಿದ್ದರು ....



ಗುರುಪ್ರಸಾದ್, ಮುನೀಶ್ ಗೌಡ,ಮಧು,ಸುಧಾಕರ್. ನಮ್ಮ ಬೆಂಗಳೂರಿನಿಂದ ಬಂದಿದ್ದ ತಂಡ



ಭಾರತದ ಬೇರೆ ಬೇರೆ ಭಾಗಗಳಿಂದ ಬಂದಿದ್ದ birders ಮತ್ತು naturalist ಅವರನ್ನು ಪರಿಚಯ ಮಾಡಿಕೊಂಡು ಅಲ್ಲಿನ ಕಾಡು ಹಾಗೆ ನಮಗೆ ಯಾವ ಜಾಗಕ್ಕೆ ಹಾಕುತ್ತಾರೋ ಎಂಬ ಕುತೂಹಲದಿಂದ ಪಟ್ಟಿ ಬಿಡುಗಡೆ ಮಾಡುವುದನ್ನು ಕಾಯುತ್ತಿದ್ದೆವು.

ಮೊದಲೇ ಊಹಿಸಿಕೊಂಡ ಹಾಗೆ ನಾವು ನಾಲ್ವರಿಗೂ ಬೇರೆ ಬೇರೆ ಕಡೆಯ ಕ್ಯಾಂಪ್ ಗಳು ಸಿಕ್ಕಿದ್ದು, ಅದರಲ್ಲಿ ನನ್ನ ಅದೃಷ್ಟ ಏನೋ ಎಂಬಂತೆ ಮುನೀಶ್ ಜೊತೆ ಬರಬೇಕಾಗಿ ಇದ್ದ ಒಬ್ಬರು ಅವರ ಕ್ಯಾಂಪ್ ನಲ್ಲಿ ಬರದೇ ಇದ್ದಿದ್ದರಿಂದ .. ನಾನು ಅಲ್ಲಿನ ಆಫೀಸರ್ ಗೆ ಹೇಳಿ ಮುನೀಶ್ ಮತ್ತೆ ನಾನು ಒಂದೇ ಕ್ಯಾಂಪ್ ನಲ್ಲಿ ಇರುವ ಹಾಗೆ ಒಟ್ಟಿಗೆ ಹಾಕಿಸಿಕೊಂಡೆವು..

ಜಿಮ್ ಕಾರ್ಬೆಟ್ ವಲಯದ ಡೈರೆಕ್ಟರ್ Dr ಧೀರಜ್ ಪಾಂಡೆ ಮತ್ತು ಫಾರೆಸ್ಟ್ ಆಫೀಸರ್ ಗಳು ಕಾಡಿನ ಬಗ್ಗೆ ಮತ್ತು ಅಲ್ಲಿ ನಾವು ನೆಡೆದು ಕೊಳ್ಳುವ ಬಗ್ಗೆ ವಿವರಿಸಿ ಹೇಳುತ್ತಾ ಇದ್ದರು. ಅವರಿಗೆ ನಮ್ಮ ಸುರಕ್ಷತೆ ಮೊದಲ ಆದ್ಯತೆ ಆಗಿತ್ತು.. ಇಡೀ ಭಾರತದಲ್ಲಿ ಅತಿ ಹೆಚ್ಚು ಹುಲಿ ಮತ್ತು ಆನೆ ಇರುವ ಪ್ರದೇಶದಲ್ಲಿ ನಾವು ಕಾಲು ನೆಡಿಗೆ ಯಲ್ಲಿ ನೆಡೆದು ಬರ್ಡ್ ಸರ್ವೇ ಮಾಡಬೇಕಾಗಿ ಇತ್ತು.. ಇಂತಹ ದಟ್ಟ ಕಾಡಿನಲ್ಲಿ ಕೆಲವೇ ಕೆಲವು ಸೆಕೆಂಡ್ ಗಳ ಅಂತರದಲ್ಲಿ ಅನಾಹುತ ಆಗುವ ಸಂಭವ ಜಾಸ್ತಿ ಇತ್ತು... ಯಾಕೆ ಅಂದರೆ ಅಂತ ಬೌಗೋಳಿಕ ವಲದ ದಟ್ಟ ಅರಣ್ಯ ಇದು.. ಅದ ಕಾರಣ ಇಲ್ಲಿನ ಪರಿಸರ ಮತ್ತು ಕಾಡಿನ ಬಗ್ಗೆ ತುಂಬ ವಿವರವಾಗಿ ಮತ್ತು ನಾವು ನೆಡೆದು ಕೊಳ್ಳುವ ಸಂಪೂರ್ಣ ಮಾಹಿತಿ ಕೊಟ್ಟಿದ್ದರು. ಹಾಗೆ ಬರ್ಡ್ ಸರ್ವೇ ನೆಡೆಯುವ ರೀತಿ , ನಾವು collect ಮಾಡಬೇಕಾದ ಡೇಟಾ ಮುಂತಾದ ಮಾಹಿತಿ ವಿನಿಮಯ ಆಗಿ ನಾವು ನಮ್ಮ ನಿಯೋಜನೆ ಆಗಿದ್ದ ಕ್ಯಾಂಪ್ ಕಡೆ ಹೊರಡುವ ಸಮಯ ಮಧ್ಯಾಹ್ನ ಎರಡು ಘಂಟೆ ಆಗಿತ್ತು...

ಅಲ್ಲೇ ಕೊಟ್ಟಿದ್ದ ಊಟದ ಪ್ಯಾಕ್ ಅನ್ನು ತೆಗೆದು ಕೊಂಡು ನಮ್ಮ ಜೊತೆಗಾರರಿಗೆ ಬೈ ಹೇಳಿ ನಮಗಾಗಿ ಕಾಯುತ್ತ ಇದ್ದ ಓಪನ್ ಜಿಪ್ಸಿ ಕಡೆ ಹೊರಟೆವು...



ಇಲ್ಲಿಂದ ಶುರು ಆಗಿದ್ದೆ ಜಿಮ್ ಕಾರ್ಬೆಟ್ ಎನ್ನುವ ಕಾಡಿನೊಳಗಿನ ರೋಮಾಂಚಕ ಪಯಣ.....

ರಾಮ್ನಗರ್ ಇಂದ ನಮಗೆ ನಿಯೋಜನೆ ಗೊಂಡಿದ್ದ ಸ್ಥಳ ಸುಮಾರು 130 km ದೂರ ಇತ್ತು ...ಇದರ ಮುಕ್ಕಾಲೂ ಭಾಗ ಕಾಡಿನ ಒಳಗಿನಿಂದ ಹೋಗಬೇಕಾಗಿದ್ದರಿಂದ ನನ್ನ ಕುತೂಹಲ ..ಎದೆಬಡಿದ ಮೊದಲ ದಿನವೇ ಜಾಸ್ತಿ ಆಗಿತ್ತು....

ನಾರ್ತ್ ಈಸ್ಟ್ ಮತ್ತು ಈ ವಲದಲ್ಲಿ ಸಿಗುವ ಪಕ್ಷಿ ವೈವಿದ್ಯತೆ ಬೇರೆಯದೇ ಇರುತ್ತೆ.. ನಮಗೆ ಇಲ್ಲಿ ಕಾಣ ಸಿಗುವ ಪಕ್ಷಿ ಎಲ್ಲ ಹೊಸದು.. ಇದರ ಬಗ್ಗೆ ತಿಳಿದು ಕೊಳ್ಳಲು ನೋಡಲು ನನ್ನ ಮನಸ್ಸು ಹಾತೊರೆಯುತ್ತ ಇತ್ತು...

ನಾವು ಹೋಗಬೇಕಿದ್ದ ಜಾಗದ ಕಡೆ , ಅಲ್ಲೇ ಸುತ್ತ ಮುತ್ತ ಹತ್ತಿರ ವಿದ್ದ ಬೇರೆ ಬೇರೆ ಕ್ಯಾಂಪ್ ನಲ್ಲಿ ಇರುವ ಮಿತ್ರರು ನಮ್ಮ ಜೀಪ್ನಲ್ಲೇ ಜೊತೆ ಗೂಡಿದರು.. ಅದರಲ್ಲಿ ಒಂದಿಬ್ಬರು ಉತ್ತರಾಖಂಡ್ ರಾಜ್ಯದವರೇ ಆಗಿದ್ದರು ಅವರ ಮಾಹಿತಿ ಪ್ರಕಾರ ಹೋಗುವ ದಾರಿಯಲ್ಲೇ ಹುಲಿ ಮತ್ತು ಆನೆ ಮುಂತಾದ ಕಾಡು ಪ್ರಾಣಿ ಸಿಗುವ ಸಂಭವ ಜಾಸ್ತಿ ಇದೆ ಎಂದು ಹೇಳಿದಾಗ ... ನಾನು ಒಳಗೆ ಇಟ್ಟಿದ್ದ ಕ್ಯಾಮೆರಾ ತೆಗೆದು ಕೈನಲ್ಲೇ ಹಿಡಿದುಕೊಂಡೆ..








ಒಂದರ ಹಿಂದೆ ಒಂದಂತೆ ಮೂರು ಜೀಪು ಗಳು ಕಾಡಿನ ದಾರಿ ಸೀಳುತ್ತ ...ಧೂಳೆಬ್ಬಿಸುತ್ತ ಬರೋ ಎಂದು ಹೊರಟಿತು...






ಕಾಡಿನಲ್ಲಿ ಸಿಗುವ ಒಂದೊಂದು ಚೆಕ್ ಪೋಸ್ಟ್ ಅಲ್ಲಿ ಎಂಟ್ರಿ ಮಾಡುತ್ತ ಸುಂದರ ಕಾಡಿನ ಪರಿಸರದ ನೋಟ ಸವಿಯುತ್ತ ಓಪನ್ ಜಿಪ್ಸಿ ನಲ್ಲಿ ನಮ್ಮ ಪಯಣ ಸಾಗಿತ್ತು...

ದಾರಿಯಲ್ಲಿ ಹೋಗುತ್ತಾ ಇರಬೇಕಾದರೆ ನಮ್ಮ ಬರ್ಡ್ ಕೌಂಟ್ ಶುರು ಆಗಿತ್ತು.. ಆಗಲೇ ಕೆಲವು ಅಪರೂಪದ ಪಕ್ಷಿಗಳ ದರ್ಶನ ಆಗುತ್ತಾ ಇತ್ತು... ವಿಶಾಲ ಹುಲ್ಲು ಗಾವಲು....ಹಳ್ಳ ಕೊಳ್ಳಗಳಿಂದ ಕೂಡಿದ ರಸ್ತೆ.. ಮಧ್ಯ ಮಧ್ಯ ಸಿಗುವ ನದಿ ತೊರೆ ಗಳನ್ನ ಧಾಟಿ ನಮ್ಮ ಜೀಪು ಮುನ್ನುಗ್ಗುತ್ತ ಇತ್ತು... ದಾರಿಯಲ್ಲಿ ಸಿಗುವ ಕೆಲವು ಫಾರೆಸ್ಟ್ ಪಾಯಿಂಟ್ ಗಳಲ್ಲಿ ಅಲ್ಲಿ ಇಳಿಸ ಬೇಕಾದ ಸಹ ಪಯಣಿಗರನ್ನು ಇಳಿಸಿ .. ನಮ್ಮ ಜೀಪು ಮುಂದೆ ಸಾಗಿತು... ದಾರಿ ಉದ್ದಕ್ಕೂ ಅಲ್ಲಲ್ಲಿ ಕಾಣ ಸಿಗುತ್ತಾ ಇದ್ದ ಜಿಂಕೆ , ಕಡವೆ, ಸಾರಂಗ .....ನವಿಲಿನ ಕೂಗು .....ಪಕ್ಷಿಗಳ ಚಿಲಿಪಿಲಿ ಕಲರವ ....ಇವೆಲ್ಲವನ್ನೂ ಬೆರಗು ಕಣ್ಣಿನಿಂದ ನೋಡುತ್ತಾ ಸಾಗಿತ್ತು ನಮ್ಮ ಪಯಣ..

ಮಧ್ಯೆ ಒಂದು ಕಡೆ ಚೆಕ್ ಪೋಸ್ಟ್ ನಲ್ಲಿ ಎಲ್ಲ ಜೀಪುಗಳು ನಿಲ್ಲಿಸಿ ನಮಗೆ ಕೊಟ್ಟಿದ್ದ ಊಟದ ಪ್ಯಾಕ್ ಅನ್ನು (ಸ್ನ್ಯಾಕ್ ಪ್ಯಾಕ್) ತಿಂದು ನೀರು ಕುಡಿದು ..ನಮ್ಮ ಪ್ರಯಾಣ ಮುಂದುವರಿಸಿದೆವು...



ಕಾಡಿನ ಕಚ್ಚಾ ರಸ್ತೆ. ಬರಿ ಮಣ್ಣು ರೋಡು ಅದರಲ್ಲೂ ಒಂದರ ಹಿಂದೆ ಒಂದಂತೆ ಜೀಪು ಸಾಗುತ್ತ ಇರಬೇಕಾದರೆ ಬರುತಿದ್ದ ಧೂಳು ನಮ್ಮ ಮೈ ಕೈ ಮುಖ ಎಲ್ಲ ಕಡೆ ಆವರಿಸಿತ್ತು...ಸದ್ಯ ನನ್ನ ಕ್ಯಾಮೆರಾ ಗೆ ಡಸ್ಟ್ ಪ್ರೂಫ್ ಹೊದ್ದಿಸಿದ್ದೆ ...ಬಚಾವಾಗಿತ್ತು... :-)


ವಿಶಾಲ ಅರಣ್ಯ ....ಒಮ್ಮೆಮ್ಮೆ ಧಟ್ಟ ಕಾಡಿನ ಒಳಗೆ ...ಮರುಕ್ಷಣ ದೊಡ್ಡ ಹುಲ್ಲು ಗಾವಲಿನ ಬಯಲು... ಮುಂದೆ ದೊಡ್ಡ ಹಳ್ಳ ಮತ್ತೊಮ್ಮೆ ಕಡಿದಾದ ಬೆಟ್ಟ ಗುಡ್ಡ ಸಾಲು ......ಜಿಮ್ ಕಾರ್ಬೆಟ್ ಅನ್ನುವ ಕಾಡು ನಿದಾನವಾಗಿ ತನ್ನ ಸೌಂದರ್ಯ ತೋರಿಸುತ್ತ ಇತ್ತು..

ಆಗಲೇ ಸಂಜೆ ಐದು ಘಂಟೆ ಆಗಿದೆ ನಾವು ತಲುಪ ಬೇಕಾದ ಸ್ಥಳ ಇನ್ನು ತುಂಬ ದೂರ ಇತ್ತು... ಡ್ರೈವರ್ ಕೂಡ ಹೊಸಬ.. ನಮ್ಮದು ಓಪನ್ ಜಿಪ್ಸಿ ಬೇರೆ.. ಮೇಲೆ ನೋಡಿದರೇ ಮೋಡಗಳ ಸಾಲು ನಿದಾನಕ್ಕೆ ಆವರಿಸುತ್ತಾ ಇದ್ದೆ. ನನಗೆ ಇವಾಗ ಭಯ ಆಗುವುದಕ್ಕೆ ಶುರು ಆಯಿತು.. ನಾವು ನೆನೆದರೆ ಪರವಾಗಿಲ್ಲ ನಮ್ಮ ಕ್ಯಾಮೆರಾ ಗತಿ ಏನು ಎಂದು ಯೋಚನೆ ಶುರುವಾಯಿತು.. ಅಲ್ಲಿ ತನಕ ಸುಮ್ಮನೆ ಇದ್ದ ಮಳೆ ರಾಯ ಒಂದೇ ಸಮನೆ ಧೋ ಎಂದು ಭಾರಿಸುವುದಕ್ಕೆ ಶುರು ಮಾಡಿದ... ಸದ್ಯ ನಮ್ಮ ಡ್ರೈವರ್ ಇಳಿದು ಜಿಪ್ಸಿ ಮೇಲೆ ಇದ್ದ ಟಾರ್ಪಲ್ ಕವರ್ ಮಾಡಿ ಫುಲ್ ಪ್ಯಾಕ್ ಮಾಡಿದ.. ಆದರೂ ನನಗೆ ಭಯ ವಾಟರ್ ಪ್ರೂಫ್ ಕವರ್ ಇದ್ದರು ಕ್ಯಾಮೆರಾ ಮೇಲೆ ನೀರು ಬೀಳದೆ ಇರುವ ಹಾಗೆ ನೋಡಿಕೊಳ್ಳ ಬೇಕಾದ ಜವಾಬ್ದಾರಿ ನನ್ನ ಮೇಲೆ ಇತ್ತು.

ಅಲ್ಲಿ ಮಳೆ ಭಯಂಕರ .. ಬಂದರೆ ಒಂದೇ ಸಮನೆ ಜೋರಾಗಿ ಸುರಿಯುತ್ತದೆ .. ಟಾರ್ಪಲ್ ಒಳಗೆ ಇಂದ ನೀರು ಸೋರುತ್ತಾ ಇತ್ತು.. ಮುಂದೆ ಸಿಕ್ಕ ಒಂದು ಫಾರೆಸ್ಟ್ ಚೆಕ್ ಪಾಯಿಂಟ್ ನಲ್ಲಿ .. ಅಲ್ಲಿ ಇಳಿಯ ಬೇಕಿದ್ದ ಜನರನ್ನು ಇಳಿಸಿ .. ಕಾಡು ಬಿಟ್ಟು ನಮ್ಮ ಜೀಪು ಮೇನ್ ರೋಡ್ ಗೆ ಬಂದಿತು.. !!!!! ಆಗಲೇ ಒಂದು ಆಶ್ಚರ್ಯ ಘಟನೆ ಕಣ್ಣ ಮುಂದೆ ನಡೆದುಹೋಯಿತು!!!!... ನಮ್ಮ ಜೀಪ್ ನಲ್ಲಿ ಮುಂದೆ ಕುಳಿತಿದ್ದ ಇಬ್ಬರು ಅಲ್ಲಿ ನೋಡಿ ...ಅಲ್ಲಿ ಅಲ್ಲಿ,,,, ಎನ್ನುತ್ತ ಕೂಗಿ ಕೊಂಡರು ಅಷ್ಟೇ ... ಅಂತಹ ಬ್ಯುಸಿಯಾದ ರೋಡಿನಲ್ಲಿ .... ಒಂದು ಚಿರತೆ ಚಂಗೆಂದು ರೋಡಿನ ಮಧ್ಯದಿಂದ ಹಾರಿ ಇನ್ನೊಂದು ಕಡೆ ಹೋಯಿತು .... ನಾವು ಗಾಡಿಯನ್ನು ನಿಲ್ಲಿಸಿ ಜೋರಾಗಿ ಸುರಿಯುತ್ತ ಇದ್ದ ಮಳೆ ಲೆಕ್ಕಿಸದೇ ಇಳಿದು ನೋಡಿದೆವು ... ಅದು ಯಾವ ಮಾಯದಲ್ಲಿ ಎಲ್ಲಿ ಮರೆಯಾಗಿ ಹೋಯಿತೋ ಆ ಚಿರತೆ...... ಅಬ್ಭಾ ಅಂತ ಮಳೆಯಲ್ಲೂ ಮೈ ರೋಮಾಂಚನದ ಅನುಭವ..

ಅದೇ ಗುಂಗಿನಲ್ಲಿ ಸ್ವಲ್ಪ ದೂರ ಸಾಗುತ್ತ ಇರಬೇಕಾದರೆ ಮಳೆ ಸಂಪೂರ್ಣ ನಿಂತು ಹೋಯ್ತು .... ಜೀಪಿಗೆ ಹೊದಿಸಿದ್ದ ಟಾರ್ಪಲ್ ತೆಗೆದು ....ಸುತ್ತಲಿನ ಆ ತಂಪಾದ ಪರಿಸರ ನೋಡುತ್ತಾ ಮೋಡಗಳ ಮಧ್ಯೆ ಅವಾಗ ಅವಾಗ ಕಾಣಿಸುತ್ತ ಇದ್ದ ಸೂರ್ಯಾಸ್ತ ನೋಡುತ್ತಾ ನಮ್ಮ ಕ್ಯಾಂಪ್ ಯಾವಾಗ ಬರುತ್ತೋ ಎಂದು ಕಾಯುತ್ತ ಇದ್ದೇವು ..

ಸಂಜೆ ೭ ಘಂಟೆ ..ಇನ್ನು ಕತ್ತಲು ಆಗಿರಲಿಲ್ಲ... ಸುಂದರ ಪರಿಸರ ಬೆಟ್ಟ ಗುಡ್ಡಗಳ ಸಾಲು.. ಪಕ್ಕದಲ್ಲಿ ದೊಡ್ಡದಾದ ಕಣಿವೆ... ಕೆಳಗೆ ಹರಿಯುತ್ತ ಇದ್ದ ನೀರಿನ ಭೋರ್ಗರೆತದ ಸದ್ದು .... ಇವುಗಳನ್ನು ನೋಡುತ್ತಾ ಮುಂದಿನ ಸ್ಟಾಪ್ ನಮ್ಮದೇ ಎಂದು ಹೇಳಿದಾಗ .. ಆ ಕ್ಯಾಂಪ್ ಹೇಗೆ ಇರುತ್ತದೋ ಏನು ಕುತೂಹಲ ದಿಂದ ನಾನು ಮತ್ತು ಮುನೀಶ್ ಕಾಯುತ್ತಾ ಕುಳಿತಿದ್ದೆವು...

ರಾತ್ರಿ ೭:೩೦ ರ ಹೊತ್ತಿಗೆ ನಾವು ಇಳಿಯ ಬೇಕಾದ ಕ್ಯಾಂಪ್ ಬಂದೆ ಬಿಟ್ಟಿತು ...ಕಾಡಿನ ಮಧ್ಯೆ...ಒಂದು ಪುಟ್ಟ ಗುಡ್ಡ ದ ಮೇಲೆ ನಮ್ಮ ಕ್ಯಾಂಪ್ ಲೈಟ್ ಕಾಣಿಸಿತು ... ಅಲ್ಲಿಗೆ ಹೋಗಲು ಅಲ್ಲೇ ಹರಿಯುತ್ತ ಇದ್ದ ನದಿ ಧಾಟಿ ಮೇಲೆ ಹೋಗಬೇಕು.... ಅರೆ ಅರೆ .... ಆಗಲೇ ನನ್ನ ಮೈ ಪುಳಕ ಗೊಂಡು ರೋಮಾಂಚನ ಆಯಿತು... ನಮ್ಮ ಜೀಪು ಸಣ್ಣಗೆ ಹರಿಯುತ್ತ ಇದ್ದ ನದಿ ದಾಟಿ ಪುಟ್ಟ ಗುಡ್ಡ ಏರಿ ನಮ್ಮ ಕ್ಯಾಂಪ್ ಗೆ ತಂದು ಬಂದು ಬಿಟ್ಟಿತು.....






ದೊಡ್ಡದಾದ ಹೇಳೇ ಕಾಲದ ಬಂಗಲೆ ..ಸುತ್ತಲೂ ಕಾಡು ಮದ್ಯ ಈ ಕ್ಯಾಂಪ್. ಕ್ಯಾಂಪ್ ಸುತ್ತ ಸೋಲಾರ್ ತಂತಿ ಬೇಲಿ......ರಾತ್ರಿ ಬೆಳಗಿನಲ್ಲೇ ಅದನ್ನು ನೋಡಿ... ಮುಂದಿನ ಮೂರು ದಿನ ಸ್ವರ್ಗ ದಲ್ಲೇ ಇರುತ್ತೇವೇ ಎಂದು ಕೊಂಡು ನಮ್ಮ ನಮ್ಮ ಬ್ಯಾಗ್ ಇಳಿಸಿ ಒಳ ಹೋದೆವು ....

ಕಾಡಿನಲ್ಲಿನ ಆ ಏಳು ಘಂಟೆ ಪಯಣ.... ಎಲ್ಲ ತರದ ಅನುಭವ ಶುರುವಿನಲ್ಲೇ ಕೊಟ್ಟು.... ಜಿಮ್ ಕಾರ್ಬೆಟ್ ಎನ್ನುವ ದಟ್ಟ ಅರಣ್ಯದ ಬಗ್ಗೆ ನನಗೆ ಇದ್ದ ಕುತೂಹಲಕ್ಕೆ ದೊಡ್ಡ ಮುನ್ನುಡಿ ಬರೆದಿತ್ತು.....




(ಮುಂದುವರೆಯುವುದು ...........ನಿಜವಾದ ಮೈ ನೆವಿರೇಳಿಸುವ ರೋಚಕ ಅನುಭವ ಶುರುವಾಗುವುದೇ ಇಲ್ಲಿಂದ ..... :-)

ಪರಿಸರ ಜಾಗೃತಿ ಮತ್ತು ಮಕ್ಕಳು

ಪರಿಸರ, ಪ್ರಾಣಿಗಳು, ಪಕ್ಷಿಗಳು, ಮರಗಿಡಗಳು, ಹಳ್ಳಕೊಳ್ಳಗಳು, ಇದರ ಒಡನಾಟದೊಂದಿಗೆ ಮಕ್ಕಳು ಬೆಳೆಯಬೇಕೆಂದು ನನ್ನ ಅನಿಸಿಕೆ. ಹಾಗೆ ಸುಮ್ಮನೆ ಲ್ಯಾಪ್ಟಾಪ್ನಲ್ಲಿ, ಮೊಬೈಲ್ನಲ್ಲಿ, ಅಥವಾ ಒಂದು ಪ್ರೆಸೆಂಟೇಶನ್ ನಲ್ಲಿ ಇದೇ ರೀತಿ ಪಕ್ಷಿಗಳು, ಈ ರೀತಿ ಮರಗಳಿರುತ್ತವೆ ಎಂದು ಹೇಳಿದರೆ ಚಿಕ್ಕಮಕ್ಕಳಿಗೆ ಅಷ್ಟು ಚೆನ್ನಾಗಿ ಗೊತ್ತಾಗುವುದು ಇಲ್ಲ.

ಹಳ್ಳಿ ಕಡೆ ಇರುವ ಮಕ್ಕಳು ಪರಿಸರ ಜೊತೆಜೊತೆಗೆ ಬೆಳೆಯುತ್ತಾರೆ. ಅದು ಸ್ವಲ್ಪ ಕಮ್ಮಿ ಆಗಿದೆ ಅಂತ ಅನ್ನಿ. ನಗರ ಪ್ರದೇಶದಲ್ಲಿ ವಾಸಿಸುವ ಮಕ್ಕಳಿಗೆ ಪಾರ್ಕ್ ಅಥವಾ ಚೆನ್ನಾಗಿ ಅಲಂಕಾರ ಮಾಡಿ ಸಿಂಗರಿಸಿಕೊಂಡಿರುವ ಬರೀ ಚರಂಡಿ ನೀರು ತುಂಬಿಕೊಂಡಿರುವ ಕೆರೆಗಳು ಕಾಣಸಿಗುತ್ತದೆ... ಆದರೆ ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ ನಡೆದಾಡಲು ಟೈಲ್ಸ್ ದಾರಿ.. ಕುಳಿತುಕೊಳ್ಳಲು ತರತರದ ಬೆಂಚುಗಳು... ಒಟ್ಟಿನಲ್ಲಿ ಕೆರೆಯಲ್ಲಿ ನೀರಿಲ್ಲದಿದ್ದರೂ ಅಥವಾ ಗಲೀಜು ನೀರಿದ್ದರೂ ನೋಡಲು ಮಾತ್ರ.. ಚಂದದ ಕೆರೆಗಳು. ನಾನು ನೋಡಿದ ಪ್ರಕಾರ ಬೆಂಗಳೂರಿನ ತುಂಬಾ ಕೆರೆಗಳ ಪರಿಸ್ಥಿತಿ ಇದೇ ರೀತಿ ಇದೆ. ಎಲ್ಲೆಲ್ಲಿ ಹಣದ ಆಸೆಗೋಸ್ಕರ ಇರುವ ಜಲಮೂಲಗಳನ್ನು ನಾಶಮಾಡಿ ನಾಮಕಾವಸ್ಥೆಗೆ ಇರುವ ಕೆರೆಗೆ ಸುಖಾಸುಮ್ಮನೆ ಖರ್ಚು ಮಾಡಿ ಇನ್ನು ಹಾಳುಮಾಡಿದ್ದಾರೆ.

ಇದೇ ರೀತಿ ಪಾರ್ಕುಗಳು ಕೂಡ ಇರೋದ್ರಲ್ಲಿ ಕೆಲವೊಂದು ಪಾರ್ಕುಗಳನ್ನು ಚೆನ್ನಾಗಿ ನೋಡಿಕೊಂಡಿದ್ದಾರೆ ಅಷ್ಟೇ.

ಬಿಡಿ ನಾನು ಇವತ್ತು ಹೇಳಹೊರಟಿರುವುದು ಮಕ್ಕಳಲ್ಲಿ ಈಗಿನಿಂದಲೇ ಪರಿಸರದ ಬಗ್ಗೆ ಅದನ್ನು ಉಳಿಸಿಕೊಳ್ಳುವ ಬಗ್ಗೆ ವಾಸ್ತವವಾಗಿ ತೋರಿಸಿ ತಿಳಿಸಿ ಹೇಳಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.. ಇಲ್ಲದಿದ್ದರೆ ಕೆಲವೊಂದು ಅಪರೂಪ ಜಾತಿಯ ಮರಗಳನ್ನು ಪ್ರಾಣಿ-ಪಕ್ಷಿಗಳನ್ನು ಬರಿ ಕಂಪ್ಯೂಟರ್, ಮೊಬೈಲ್ ನಲ್ಲಿ ಫೋಟೋಗಳನ್ನು ನೋಡಬೇಕು ಅಷ್ಟೇ.

ನಾನು ಇರುವುದು ಬೆಂಗಳೂರು ಯೂನಿವರ್ಸಿಟಿ ಹಿಂಭಾಗ.. ಜ್ಞಾನಭಾರತಿ ಎಂಬ ಬಡಾವಣೆ ನಮ್ಮದು.. ಒಂದು ಖುಷಿಪಡುವ ವಿಚಾರವೆಂದರೆ ಸುಮಾರು 1200 ಎಕರೆ ಪ್ರದೇಶದಲ್ಲಿ ಸುಂದರವಾಗಿ ಇರುವ ನಮ್ಮ ಯುನಿವರ್ಸಿಟಿ ಕ್ಯಾಂಪಸ್. ಇದು ಒಂದು ಕಿರು ಅರಣ್ಯ ಪ್ರದೇಶವೆಂದು ಕರೆಯಲ್ಪಡುತ್ತದೆ.. ಅಧಿಕಾರದಾಸೆ ಹಾಗೂ ಹಣದಾಸೆ ಗೋಸ್ಕರ 1200 ಎಕರೆ ಈಗ ಅರ್ಧಕ್ಕರ್ಧ ನಾಶವಾಗಿದೆ. ವಿನಾಕಾರಣ ಅನಗತ್ಯ ಕಟ್ಟಡಗಳು, ಚೆನ್ನಾಗಿ ಬೆಳೆದಿರುವ ಮರಗಿಡಗಳನ್ನು ನೆಲಸಮ ಮಾಡಿ ತಲೆಯೆತ್ತುತ್ತಿರುವ ಕಟ್ಟಡಗಳು.. ನಮ್ಮ ಆಕ್ಸಿಜನ್ ಬ್ಯಾಂಕ್ ಆದ ಕಿರು ಅರಣ್ಯ ನಾಶಕ್ಕೆ ಮುನ್ನುಡಿ ಬರೆದಿದೆ..

ಪರಿಸರಪ್ರಿಯರ ಹಾಗೂ ಇಲ್ಲಿರುವ ಕೆಲವರು ಮುತುವರ್ಜಿಯಿಂದ ಅಳಿದುಳಿದಿರುವ ಮರಗಳನ್ನು ಹೋರಾಟ ಮಾಡಿ ಉಳಿಸಿಕೊಳ್ಳಬೇಕಾದ ಪರಿಸ್ಥಿತಿ ನಮ್ಮ ಎದುರು ನಿಂತಿದೆ..

ನಮ್ಮ ರೋಡಿನಲ್ಲಿರುವ ಮಕ್ಕಳನ್ನು ಕರೆದುಕೊಂಡು ಸಾಧ್ಯವಾದಾಗಲೆಲ್ಲ ಈ ಪರಿಸರಕ್ಕೆ ಕರೆದುಕೊಂಡು ಹೋಗುತ್ತೇನೆ.. ಕಣ್ಣ ಮುಂದೆಯೇ ಹಾರಿಹೋಗುವ ನವಿಲುಗಳು, ರೆಕ್ಕೆಬಿಚ್ಚಿ ಹಾರಾಡುವ ತರತರದ ಹಕ್ಕಿಗಳು. ವಲಸೆ ಹಕ್ಕಿಗಳು, ಹಾವು.. ಮುಂಗುಸಿ... ಉದುರಿದ ಎಲೆಗಳು.. ಚಿಗುರುತ್ತಿರುವ ಹೊಸ ಹೊಸ ಎಲೆಗಳು.. ಹಸಿರು ಮರಗಳು... ಗಿಡಗಳು.. ಇವುಗಳನ್ನು ನಮ್ಮ ಮಕ್ಕಳನ್ನು ಕರೆದುಕೊಂಡು ಹೋಗುತ್ತಿದ್ದಾಗ ಅವರು ನೋಡಿ ಅನುಭವಿಸಿ ಕೇಳುವಂತ ಪ್ರಶ್ನೆಗಳು ತುಂಬಾ ಖುಷಿ ಕೊಡುತ್ತದೆ.. ಒಂದು ಪಕ್ಷಿ ಇನ್ನೊಂದು ಪಕ್ಷಿಯ ಆಹಾರವನ್ನು ಕಿತ್ತುಕೊಳ್ಳಲು ಸೆಣಸಾಡುತ್ತಾ ಇದ್ದ ರೀತಿ.. ಕಾಗೆ... ಹದ್ದು... ತಮ್ಮ ಗೂಡು ಕಟ್ಟಿಕೊಳ್ಳಲು ಮರದ ಚಿಕ್ಕ ಚಿಕ್ಕ ಕಡ್ಡಿಗಳನ್ನು ತೆಗೆದುಕೊಂಡು ಹೋಗುತ್ತಿದ್ದ ನೋಟ.. ಹಕ್ಕಿಗಳು ತಮ್ಮ ಮರಿಗಳಿಗೆ ಆಹಾರವನ್ನು ತಿನ್ನಿಸುತ್ತಿದ್ದ ರೀತಿ... ಇದೆಲ್ಲವನ್ನು ನನ್ನ ಮಕ್ಕಳು ಹಾಗೂ ನಮ್ಮ ರೋಡಿನ ಮಕ್ಕಳೆಲ್ಲ ಖುಷಿಯಿಂದ ಆನಂದಿಸಿ ಪ್ರಶ್ನೆಗಳನ್ನು ಕೇಳುತ್ತಾ ಪರಿಸರದ ಪಾಠವನ್ನು ಕಲಿತರು..

ನಮಗಾಗಿ ಕಾಡು.... ಕಾಡಿಗಾಗಿ ನಾವಲ್ಲ....

ನಮಗಾಗಿ ಕಾಡು.... ಕಾಡಿಗಾಗಿ ನಾವಲ್ಲ....

ಗೋಪಾಲ್ NGO ಅವರು ಆಯೋಜಿಸಿದ್ದ ಸೀಡ್ ಬಾಲ್(ಮರದ ಬೀಜದ ಮಣ್ಣಿನ ಉಂಡೆ) ಇದರ ತಯಾರಿಸುವ ಕಾರ್ಯಕ್ರಮವನ್ನು ಹುಣಸೂರಿನ ಹತ್ತಿರ ಇರುವ ಚೌಡಿ ಕೆರೆ ಎಂಬ ಗ್ರಾಮದ ಸಮೀಪ ಶಿವಯೋಗ ದೇಶಿ ಗೋಶಾಲಾ ಇಲ್ಲಿ ಆಯೋಜಿಸಿದ್ದರು..

ಬೆಂಗಳೂರಿನಿಂದ ಸುಮಾರು 170 ಕಿಲೋಮೀಟರ್ ಗಳ ದೂರದಲ್ಲಿ ಇದೆ ಇದು ನಾಗರಹೊಳೆ ರಾಷ್ಟ್ರೀಯ ಅರಣ್ಯಕ್ಕೆ ಹೊಂದಿಕೊಂಡಿದೆ.

ನಾವುಗಳು ಮೈಸೂರಿಗೆ ಶನಿವಾರವೇ ಹೋಗಿ ಭಾನುವಾರ ಬೆಳಿಗ್ಗೆ ಎಂಟು ಗಂಟೆ ಹೊತ್ತಿಗೆ ಇಲ್ಲಿಗೆ ಬಂದು ಸೇರಿದೆವು,

ದೇಶಿ ಗೋಶಾಲ ಇಲ್ಲಿಯ ಮುಖ್ಯ ಗುರುಗಳಾದ ಶ್ರೀಯುತ "ತಮ್ಮಯ್ಯ" ಅವರು ಗೋ ತಳಿಗಳ ಬಗ್ಗೆ ಅವುಗಳ ಸಂರಕ್ಷಣೆ ಬಗ್ಗೆ ಕೆಲ ಹೊತ್ತು ತಮ್ಮ ಅನುಭವ ಹಾಗೂ ನಡೆಸುತ್ತಿರುವ ಗೋ ಶಾಲೆಯ ಬಗ್ಗೆ ತಿಳಿ ಹೇಳಿದರು ಇದಾದ ನಂತರ ಅಮೃತ ಆಹಾರ ಇದನ್ನು ಎಲ್ಲರಿಗೂ ಕೊಡಲಾಯಿತು ಹೆಸರು ಕಾಳು ಕೊಬ್ಬರಿ ಬೆಲ್ಲ ಹಸಿ ಕಾಳುಗಳು ಹಾಗೂ ಹಸಿಯಾದ ಕಡಲೇಕಾಯಿ...

ಮೊದಮೊದಲು ಇದನ್ನು ನಮ್ಮಂತ ಬೆಂಗಳೂರಿಗರಿಗೆ ಸ್ವಲ್ಪ ಕಷ್ಟವಾಯಿತು ಏನಪ್ಪಾ ಇವರು ತಿಂಡಿ ಅಂತ ಇದೇನೋ ಕಾಳುಗಳನ್ನು ಕೊಟ್ಟಿದ್ದಾರೆ ಎಂದು... ಕಷ್ಟಪಟ್ಟು ತಿಂದೆವು ಅದಾದ ಸ್ವಲ್ಪ ಹೊತ್ತಿಗೆ ಇಲ್ಲಿಯ ಗೋಶಾಲೆಯ ಗುರುಗಳು ಇದರ ಮಹತ್ವವನ್ನು ತಿಳಿಸಿ ಹೇಳಿದರು... ಬರೀ ಒಂದು 150 ಗ್ರಾಂ ಇರಬಹುದು ಇಷ್ಟರಲ್ಲಿಯೇ ನಮ್ಮ ದೇಹಕ್ಕೆ ಬೇಕಾಗುವ ಎಲ್ಲಾ ಖನಿಜಾಂಶಗಳು ಸೇರಿದ್ದವು... ನಿಜ ಹೇಳಬೇಕೆಂದರೆ ಅಷ್ಟು ಬಿಸಿಲಿನಲ್ಲಿ ನಡೆದಾಡಿ ಅಲ್ಲಿನ ಪರಿಸರವನ್ನು ಗೋಶಾಲೆಯನ್ನು ನೋಡಿ ಸೀಡ್ ಬಾಲ್ ಪ್ರೆಪರೇಶನ್ಸ್ ಎಲ್ಲವನ್ನೂ ಮಾಡಿ ಒಂದುವರೆ ಅಥವಾ 2.0 ಗಂಟೆ ವರೆಗೂ ನಾನಾ ವಿಧದ ಕಾರ್ಯಗಳಲ್ಲಿ ಭಾಗಿಯಾಗಿದ್ದರೂ ಕೂಡ ಒಂದು ಚೂರು ಹಸಿವು ಆಗಲೇ ಇಲ್ಲ.... ಇದು ನಮ್ಮ ಅನುಭವಕ್ಕೆ ಬಂದಾಗಲೇ ಗೊತ್ತಾಗಿದ್ದು ನಾವು ಯಾವ ರೀತಿಯ ಅಮೃತ ಆಹಾರವನ್ನು ತಿಂದೆವು ಎಂದು..... ಇದು ನಿಜಕ್ಕೂ ಅದ್ಭುತ.... ನಮ್ಮ ಸ್ವಂತ ಅನುಭವದ ಮೇಲೆ ನಾನು ಇದನ್ನು ಹೇಳುತ್ತಿದ್ದೇನೆ.. ಹಸಿಯಾದ ಕಾಳು ತರಕಾರಿಗಳು ಕೊಬ್ಬರಿ ಮತ್ತು ಬೆಲ್ಲ ಇಷ್ಟರಲ್ಲಿ ಎಷ್ಟೊಂದು ಸತ್ವವು ಅಡಗಿದೆ ಅಬ್ಬಾ...

ಇದಾದ ಬಳಿಕ ಗೋಶಾಲೆಯ ಪರಿಸರವನ್ನು ಅಲ್ಲಿ ಬೆಳೆಸಿರುವ ಗಿಡಗಳನ್ನು ಮರಗಳನ್ನು ಹಾಗೂ ತಾವೇ ಕಷ್ಟಪಟ್ಟು ನಿರ್ಮಿಸಿದ 6 ಚಿಕ್ಕ ಚಿಕ್ಕ ಕೆರೆ ಅಥವಾ ಹೊಂಡಗಳ ಬಗ್ಗೆ ಅಪೂರ್ವವಾದ ಮಾಹಿತಿ ಅನ್ನು ಇಲ್ಲಿಯ ಗೋ ಶಾಲೆ ಗುರುಗಳು ವಿವರವಾಗಿ ಎಲ್ಲವನ್ನೂ ಬಿಡಿಸಿ ಬಿಡಿಸಿ ಹೇಳಿದರು, ಸುಮಾರು 20 ವರ್ಷದ ಹಿಂದೆ ಇವರು ಇಲ್ಲಿಗೆ ಬಂದು ಕೆರೆಗಳನ್ನು ತೋಡಿ ನೈಸರ್ಗಿಕವಾಗಿ ಬೇರೆ ಯಾವ ಕೆಮಿಕಲ್ಸ್ ಇಲ್ಲದೆ ಕೃಷಿ ಮಾಡತೊಡಗಿದಾಗ..  ಸುತ್ತಮುತ್ತಲ ಹಳ್ಳಿಯವರು ಇವರನ್ನು ನೋಡಿ ಆಡಿ ಕೊಂಡರಂತೆ... ಇವರಿಗೆ ನಿಜವಾಗಿಯೂ ಹುಚ್ಚುಹಿಡಿದಿದೆ ಎಂದು... ಆರು ತಿಂಗಳ ಕಾಲ ಕಷ್ಟಪಟ್ಟು ನೀರಿನ ಹೊಂಡಗಳನ್ನು ಮಾಡಿ ಬಿಟ್ಟರು... ಅದರ ನಿಜವಾದ ಮಹತ್ವ  ಒಂದು ಸಾರಿ ಬೇಸಿಗೆ ಬಂದಾಗ ಗೊತ್ತಾಯ್ತು..  ಬೇರೆ ಎಲ್ಲಾ ಕೆರೆ ಕಟ್ಟೆಗಳು ಒಣಗಿತೊಡಗಿದಾಗ... ಇವರ ಆರು ಹೊಂಡಗಳಲ್ಲಿ ಸಮೃದ್ಧವಾಗಿ ನೀರು ಇರುತ್ತಿತ್ತು ಇದನ್ನು ನೋಡಿ ಅಕ್ಕ ಪಕ್ಕದ ಹಳ್ಳಿಯ ಜನಗಳು ಟ್ಯಾಂಕರ್ ಗಳಲ್ಲಿ ಇಲ್ಲಿಯ ಹೊಳೆಗಳಿಂದ ನೀರನ್ನು ಕೊಂಡು ಹೋಗಿ ಇವರನ್ನು ಶ್ಲಾಘಿಸು ತೊಡಗಿದರು. ಅವಾಗ ಇದರ ಮಹತ್ವ ಗೊತ್ತಾಯಿತು...

ಬರೀ ನೈಸರ್ಗಿಕವಾಗಿ ಸಮೃದ್ಧವಾಗಿ ಬೆಳೆದ ತೆಂಗಿನ ಮರಗಳು ಬೇವು ಕಾಡಿನ ಅರಳಿ ಮರ ಆಲದ ಮರ ಹೊಸದಾಗಿ ನೆಟ್ಟಿರುವ ಔಷಧೀಯ ಸಸ್ಯಗಳು ,, ಸ್ವಾಭಾವಿಕ ಹಾಗೂ ನೈಸರ್ಗಿಕ ಪರಿಸರದಲ್ಲಿ ಬೆಳೆಯುತ್ತಿರುವ ಬಾಳೆ ಗೊನೆಗಳು ಪಪ್ಪಾಯ ಮರಗಳು,, ಅಬ್ಬಬ್ಬಾ ನಿಜವಾಗಲೂ ಇದು ಒಂದು ಅದ್ಭುತ ಅನುಭವ.... ಯಾರಿಗಾದರೂ ಕೃಷಿಯ ಬಗ್ಗೆ ತಿಳಿದುಕೊಳ್ಳಬೇಕು \ ಹಾಗೂ ನೈಸರ್ಗಿಕವಾಗಿ ಬೆಳೆ ಬೆಳೆಸಲು ತಿಳಿದುಕೊಳ್ಳಲು ಒಮ್ಮೆ ಇಲ್ಲಿಗೆ ಭೇಟಿ ನೀಡಲೇಬೇಕು...
ಗೂಗಲ್ ಕೊಂಡಿ ಶಿವಯೋಗ ದೇಶೀ ಗೋಶಾಲೆ 
ನಮ್ಮ ಸಾವಯವ ಪದ್ಧತಿ ಎಷ್ಟು ಅಮೂಲ್ಯವಾದದ್ದು ಅದರ ಮಹತ್ವ ನಿಜವಾಗಲೂ ಅದ್ಭುತ....

ಇದಕ್ಕಿಂತ ಮೊದಲು ಗಾಣವನ್ನು ಮತ್ತು ಅದರ ಮಹತ್ವವನ್ನು ಗಾಣ ನಡೆಸುತ್ತಿರುವ ಸಮಯದಲ್ಲಿ ಅದ್ಭುತವಾಗಿ ತಿಳಿಸಿ ಹೇಳಿದರು...

ದೇಶಿಯವಾಗಿ ಕಲಬೆರಕೆ ಇಲ್ಲದ ಎಣ್ಣೆಯನ್ನು ಯಾಕೆ ಸೇವಿಸಬೇಕು ಅದರಿಂದ ಆಗುವ ಉಪಯೋಗಗಳನ್ನು ವಿವರಿಸಿ ಹೇಳಿದರು..

ಇದರ ಬಳಿಕ ಗೋಪಾಲ್ ಎನ್ನುವ ಸ್ವಯಂ ಸಂಸ್ಥೆ ಇದರ ಬಗ್ಗೆ ವಿವರಣೆಗಳು ಹಾಗೂ ಮಿ ಹಮ್ಮಿಕೊಂಡಿರುವ ಕಾರ್ಯಕ್ರಮಗಳು ಇದರ ಬಗ್ಗೆ ಚರ್ಚೆ ನಡೆದವು.. ತದನಂತರ ಬಂದಿರುವ ಸುಮಾರು 100 ಜನಗಳಿಗೆ ಒಳ್ಳೆ ಒಳ್ಳೆ ಮರದ ಬೀಜಗಳನ್ನು ಕೊಡಲಾಯಿತು ಹಾಗೆ ಸೀಡ್ ಬಾಲ್ ಅಂದರೆ ಬೀಜದ ಮಣ್ಣಿನಹುಂಡೆ ಹೇಗೆ ಮಾಡಬೇಕೆಂದು ಹೇಳಿಕೊಡಲಾಯಿತು ಇದನ್ನು ಅನುಸರಿಸಿ ಸ್ವಯಂಸೇವಕರಾಗಿ ಬಂದಿದ್ದ ಮಕ್ಕಳಿಂದ ಹಿಡಿದು ವೃದ್ಧರವರೆಗೆ ಎಲ್ಲರೂ ಪಾಲ್ಗೊಂಡು ಸರಿಸುಮಾರು ಸಾವಿರಕ್ಕೂ ಮೇಲ್ಪಟ್ಟು ಮಣ್ಣಿನ ಬೀಜದ ಉಂಡೆಗಳನ್ನು.. ಸೀಡ್ ಬಾಲ್ ಗಳನ್ನು ಮಾಡಲಾಯಿತು ಇದನ್ನು ಒಣಗಿಸಿ... ಮಾನ್ಸೂನ್ ಮಳೆಗಾಲದ ಸಮಯದಲ್ಲಿ ಕಾಡಿನಲ್ಲಿ ಅಥವಾ ಕಾಡಿನ ಅಂಚಿನಲ್ಲಿ ಎಲ್ಲಾದರೂ ಎಸೆದರೆ ಆಯಿತು... ನೈಸರ್ಗಿಕವಾಗಿ ಬೀಳುವ ಮಳೆ ಗಳಿಂದ ಗಿಡಗಳು ಬೆಳೆದು ಮರಗಳ ಆಗುತ್ತದೆ... ಇತ್ತೀಚೆಗೆ ನಡೆದ ಕಾಳ್ಗಿಚ್ಚು ಅರಣ್ಯ ವಿನಾಶ ದಿಂದ ಬಹುಮುಖ್ಯವಾದ ಅರಣ್ಯ ಸಂಪತ್ತು ನಾಶವಾಗಿದೆ ಇದನ್ನು ಬೆಳೆಸುವ ಸಲುವಾಗಿ ನಮ್ಮ ಈ ಪುಟ್ಟ ಕಾಣಿಕೆ ಇದರಲ್ಲಿ ಎಷ್ಟು ಮರ-ಗಿಡಗಳು ಬರುತ್ತೋ ಗೊತ್ತಿಲ್ಲ, ಆದರೂ ನಮ್ಮ ಪ್ರಯತ್ನ ನಾವು ಮಾಡುತ್ತಿದ್ದೇವೆ ಪ್ರಕೃತಿಗೆ ನಾವು ಸ್ವಲ್ಪ ಕಾಣಿಕೆಯನ್ನು ನಮ್ಮ ಕೈಲಾದ ಮಟ್ಟಿಗೆ ಮಾಡುತ್ತಿದ್ದೇವೆ. ಕಾಡುಗಳ ಸಂರಕ್ಷಣೆ ಹಾಗೂ ಮರಗಿಡಗಳನ್ನು ಹೆಚ್ಚು ಹೆಚ್ಚು ಬೆಳೆಸುವ ದಾರಿ ಜವಾಬ್ದಾರಿ ನಮ್ಮ ಮೇಲಿದೆ.... ಎಲ್ಲರೂ ಸಾಧ್ಯವಾದಷ್ಟು ಇಂತಹ ಕಾರ್ಯಕ್ರಮಗಳಲ್ಲಿ ಭಾಗಿಯಾಗಿ ಪರಿಸರ ಸಂರಕ್ಷಣೆಯ ಜವಾಬ್ದಾರಿಯನ್ನು ಕೋರೋಣ....

ನಮ್ಮ ಕುಟುಂಬದವರು ನಮ್ಮ ಬಳಗದ ಕುಟುಂಬದವರು ಕೂಡ ಚಿಕ್ಕ ಮಕ್ಕಳು ಹಾಗು ದೊಡ್ಡವರು ಇದರಲ್ಲಿ ಬಾಗಿಯಾಗಿ ಪಾಲ್ಗೊಂಡಿದ್ದ ಕ್ಕೆ ತುಂಬಾ ಸಂತೋಷವಾಯಿತು ವ್ಯರ್ಥವಾಗಿ ಕಳೆಯಬೇಕಿದ್ದ ಒಂದು ಭಾನುವಾರ ಈ ರೀತಿಯ ಪರಿಸರದ ಜೊತೆಯಲ್ಲಿ ಪರಿಸರ ಕ್ಕೋಸ್ಕರ ನಮ್ಮ ಕೈಯನ್ನು ಮಣ್ಣುಮಾಡಿಕೊಂಡು ನೂರಾರು ಮರದ ಬೀಜದ ಮಣ್ಣಿನ ಉಂಡೆಗಳನ್ನು (ಸೀಡ್ಸ್ ಬಾಲ್) ಮಾಡಿದ್ದರ ತೃಪ್ತಿ ಹಾಗೂ ಸಂತೋಷ ನಮ್ಮದಾಯಿತು...

ನಾನುಕೂಡ ಗೋಪಾಲ್ ಸ್ವಯಂ ಸೇವಕ ಸಂಸ್ಥೆಯ ಸೇವಕ ನಾಗಿದ್ದೇನೆ ಮುಂದಿನ ದಿನಗಳಲ್ಲಿ ಇಂತಹ ಹಾಗೂ ನಮ್ಮ ದೇಶಿ ತಳಿಯ ಹಸುಗಳ ಬಗ್ಗೆ ಹಾಗೂ ಅದನ್ನು ಸಾಕುವ ಬಗ್ಗೆ ಹಾಗೆ ಇದರ ಮಹತ್ವ ಹೆಚ್ಚಿನ ಜನರಿಗೆ ತಿಳಿಸಬೇಕೆಂದು ಗೋಪಾಲ್ ಸ್ವಯಂ ಸೇವಕ ಸಂಸ್ಥೆ ಪಣತೊಟ್ಟಿದೆ ಇಂತಹ ಹೆಚ್ಚು ಹೆಚ್ಚು ಕಾರ್ಯಕ್ರಮಗಳ ಬಗ್ಗೆ ನನ್ನ ಫೇಸ್ಬುಕ್ ಬ್ಲಾಗ್ ನಲ್ಲಿ ತಿಳಿಸುತ್ತೇನೆ ಯಾರಿಗಾದರೂ ಇದರ ಬಗ್ಗೆ ಆಸಕ್ತಿ ಇದ್ದಲ್ಲಿ ನನ್ನನ್ನು ಸಂಪರ್ಕಿಸಬಹುದು

We gopals organization website link :- http://wegopals.com/

ಅಮೃತ ಆಹಾರ.

ಆಲದ  ಮರದ ಮಹತ್ವ ನಿಜವಾಗಿಯೂ ನನಗೆ ಇವಾಗ್ಲೆ ಗೊತ್ತಾಗಿದ್ದು.... ಮಟ ಮಟ ಮಧ್ಯಾಹ್ನ .. ಬಿರು ಬಿಸಿಲು.... ತೋಟದ ತುಂಬೆಲ್ಲ ಸುತ್ತಾಡಿ.... ಸುಸ್ತಾಗಿದ್ದೆವು...  ಇಲ್ಲಿ ಬಂದು ಕುಳಿತು ಒಂದು ಮೂರು ಘಂಟೆ ಹೀಗೆ ಹೋಯಿತೋ ಗೊತ್ತಾಗಲೇ ಇಲ್ಲ... ಒಳ್ಳೆ ತಂಪಾದ ವಾತಾವರಣದಲ್ಲಿ ಇದ್ದದ್ದ ಹಾಗೆ ಇತ್ತು...  ಯಾವ ಪೆಂಡಾಲ್, AC  ಫ್ಯಾನ್   ಏನು ಬೇಕಿರಲಿಲ್ಲ..... ಅಷ್ಟು ತಂಪಾದ ನೆರಳು ಹಾಗು ಗಾಳಿ  ಇತ್ತು....  ಅಲ್ಲಿಂದ ಒಂದು ಚೂರು ಹೊರಗೆ ಬಂದರೆ ನಮಗೆ ಗೊತ್ತಾಗುತ್ತಾ ಇತ್ತು ಎಷ್ಟು ಬಿಸಿಲು ಇದೆ ಅಂತ.....    ಅದಕ್ಕೆ ಹೇಳೋದು ಒಂದು ಅರಳಿ ಅಥವಾ ಆಲದ ಮರ ಎಷ್ಟು ಉಪಕಾರಿ ಅಂತ.....

ಗೋಶಾಲೆ ಬಗ್ಗೆ ಕೆಲವು ಮಾಹಿತಿ ನೀಡುತ್ತಿರುವುದು 

 ವೈವಿಧ್ಯ ಸಸ್ಯಗಳ ಬಗ್ಗೆ ಹಾಗು ನೈಸರ್ಗಿಕ ವಾಗಿ ಬೆಳೆಸುವ ವಿಧಾನದ ಬಗ್ಗೆ ಮಾಹಿತಿ.. 

 ಸೀಡ್ಸ್ ಬಾಲ್ಸ್,  ಮರದ ಬೀಜದ ಮಣ್ಣಿನ ಉಂಡೆ ಮಾಡಲು ತಯಾರಿ.

 ನಮ್ಮ ಹಾಗು ನಮ್ಮ ಕಸಿನ್ಸ್ ಕುಟುಂಬ.... ಜೊತೆಯಾಗಿ ಸೀಡ್ಸ್ ಬಾಲ್ ತಯಾರಿಸಲು ಅಣಿಯಾಗುತ್ತಾ

 ಯೋಗದ ಹಾಗು ಆರೋಗ್ಯದ ಮಹತ್ವ ಬಗ್ಗೆ ಒಂದು ಸಣ್ಣ ಕಾರ್ಯಕ್ರಮ.